தேடிக்கொண்டிருக்கிறேன்
தொலைந்து போன ஏதோ ஒன்றை
தேடல்கள்
அதிகரித்ததாலோ ஏனோ
மறந்தே போனது
எதை தொலைத்தேன்?
இதோ !
எனது தேடல்களும்
தொடர்ந்த வண்ணமே
மேகத்துள் மறைந்த நீர்த்துளி
கால் நழுவி பூமியில் விழுந்து
தொலைந்து போனதே!
அதையா தேடுகிறேன்
அல்லது,
பெளர்ணமி அன்று நிலவு
மறைந்து போனதே
அதையா தேடுகிறேன்?
கண்விழித்த போது
கனவு கலைந்து போனதே
அதைத்தான் தேடுகிறேனோ?
கைக்கொடுக்க வந்த உறவுகள்
கைநழுவிப்போனதே
அதைத்தானோ?
நிலாச் சோறுண்டு
நித்தம் மகிழ்ந்த அந்த
நிஷ்களங்கமான
குழந்தைப் பருவத்தையோ?
தாயின் மடியில்
தலை சாய்த்து அமைதி கண்ட
பள்ளிப் பருவத்தையோ?
தெரியவில்லை!
தேடல்கள்
அதிகரித்ததாலோ ஏனோ
மறந்தே போனது
எதைத் தேடுகிறேன்
இருப்பினும் எனது
தேடல்கள் தொடர்கின்றன
தேடல்களும்
தேர்வுகளும் தானே வாழ்க்கை...