அனுபவம்...

சதையும் இரத்தமும் நரம்புமாய் வாழும்

ஒவ்வொரு தனிப்பட்ட மனிதர்களையும்

அவர்களின் அனுபவம் தான் முதலில் தீர்மானிக்கிறது.

கற்றுத் தந்த ஆசிரியர்களை விட,

கற்றுக் கொள்ள உதவிய புத்தகங்களை விட

இந்த அனுபவங்கள் தான்

ஒருவரை தலைவராக

மற்றொருவரை 

தறுதலையாக 

மாற்றுவதில் முக்கிய பங்கு வகிக்கிறது...

இது அனைவருக்குமான வாழ்க்கை...

நம் வாழ்க்கை களவாடப்படிருக்கிறது
சிறைப்படுத்தப்பட்டிருக்கிறது
அதை நாம் மீட்டாக வேண்டும்
அதற்காகப் போராடித்தன் ஆக வேண்டும்
அனைவரும் சேர்ந்து ஏனென்றால்
இது அனைவருக்குமான வாழ்க்கை...

இயற்கை நியதி

 

சிந்தனை, செயல், திறமை என

எல்லாவற்றிலும் மனிதர்கள் ஒருவருக்கொருவர்

வித்தியாசப்பட்டவர்களாகவும் ஏற்றத்தாழ்வு

உடையவர்களாகவும் இருக்கும்படிதான்

இயற்கை அமைப்பே நிறுவப்பட்டிருக்கிறது.

அதில் சமத்துவம் கிடையாது

அதேபோல் விரும்பியோ விரும்பாமலோ

அதன் சட்டங்களுக்கு எல்லோரும்

அடிபணிந்துதான் ஆக வேண்டும்.

இயற்கை நியதிகளை மிஞ்சி

யாராலும் சுதந்திரமாக இருக்க முடியாது...

நதியைக் காணும் போது

 

நதியைக் காணும் போது எனக்கு
அதில் ஒரு நீர்க்குமிழியாகி விடும் ஆசை தோன்றுவதுண்டு
நதி எத்தனையோ ரகசியங்களை நம் காதுகளில்
கிசுகிசுத்துக் கொண்டேயிருக்கிறது
அதைப் புரிந்துகொள்ளத்தான் அவகாசமும்,ஆர்வமும் நம்மிடம் இல்லை...

மனிதன்...

பட்டுப் புழுவைப்

போன்றவன் மனிதன்

அது

தன் கூட்டைக் கட்டுகிறது

அதற்குள்ளேயே

துயரத்தோடு செத்து விடுகிறது...

தனிமரமானேன்...

வெயிலுக்குப் பயந்து
பதுங்கிக் கொள்ளும் பனித்துளி போல்
உன் நினைவுக்குள் ஒழிந்தே வாழ்கின்றேன் நான்
விண்ணுலகில் காணாத உன் தரிசனத்தை
மறைத்தே வைத்துள்ளாய்
எனைத் தொடரும் என் நிழல் போல
உனைச் சுமந்தபடியே தனிமரமானேன்...

கண்ணீர்...

ஓராயிரம் துளி உதிரக் கண்ணீரை

காதல் தன்னுள்ளே

புதைத்து வைத்திருந்தது

நான்

தணித்து விடப்பட்ட போது

எனது விழிகளுக்குள்

திணித்து மறைந்தது...

இன்னும் அந்நியன் நிலையோ..?

காற்றடித்த திசையில்
வந்திங்கு கால் பதித்த விஜயன்
நிரந்தரமாகி விட்டான்!
கடலில்
கரைந்தவர் போக
மீண்ட நாங்கள்
வனமிங்கழித்து
வளம் சேர்ந்த பின்னும்
அடைப்புக்குறிக்குள்
இன்னும் அந்நியன் நிலையோ..?

என் காதலைப்பற்றி...

நிழலினதும் இரவினதும் அழுக்குகளை

துடைத்து விட்டுப் போகும்

உன் பார்வையில் பட்டுவிட துடிக்கிறது

என் இளம் வயசு!

புழுதி மண் குழியில்

தன்னை துவட்டிக்கொண்ட

குருவியின் விளையாட்டுப் போலல்ல

என் காதல்!

மீசையின் முடியை

நக்கிப் பார்க்கும்

நாக்கின் நுனியால் கொப்பளிக்கப்படும்

வெறும் வார்த்தையும் அல்ல

என் காதல்!

உன் இதயம் பூத்து

என் இதயம் சிலிர்க்கும்

காலம் வரும்

அப்போது சொல்லுவேன்

என் காதலைப்பற்றி...

விடியலை விபச்சாரம் செய்த

பனிக்கூட்டங்களின்

ரகசியத்தை

சேவலின் கூவல்

மொழி பெயர்ப்பதை போல...

அமைதி தொலைந்தது...

தேடுங்கள் கிடைக்குமென்றார்
தட்டுங்கள் திறக்குமென்றார்
தட்டிய கதவுகள்
தானாய் மூடிக் கொண்டன
ஏன் அவை மூடின?
ஓ...
அவை இதயக் கதவுகளா..?
இல்லை...
அவை இரும்புக் கதவுகள்
அதனால் தான் மூடிக் கொண்டன
அதனால் தான் - நான்
தேடியது கிடைக்கவில்லை
அயலிலே அனல் வீசுகின்றன
உறவுகள் ஊமையாகின்றன
உதிரத்தில் தேட - அவை
உக்கிரமாய் துளைக்கின்றன
அனைத்திலும் தேடி
அமைதி தொலைந்தது...

நெஞ்சிலேன் போராட்டம்...

                      

 

தேடியே ஓடுகிறேன்
கல் நிறைந்த பாதையிலும்
முள் நிறைந்த வீதியிலும்
பசுந்தரைகள் காணவில்லை
பரந்திருக்கிறது பாலைவனம்
தென்றலைத் தெரியவில்லை
சூழல்கிறது சூறாவளி
நாற்றிசையிலும்
நயவஞ்சகர் கூட்டம்
ஏனிந்த வாழ்க்கை
நெஞ்சிலேன் போராட்டம்...

காதல்...

காதல்

தன் எல்லைகளில் மலர்களை நட்டு
மத்தியில் சூனியத்தை வைத்துள்ள
போலி நந்தவனம்...

உண்மை...

நமக்கு எல்லாரும் இருக்கிறார்கள்
என்னும் போலியான
நம்பிக்கையை விட...
நமக்காக யாரும் இல்லை
என்கிற "உண்மை"
அதிக தன்னம்பிக்கை தருகிறது...

வாழ்க்கை வாடகைக்கு உண்டு...

என் வாழ்க்கையின்
ஒவ்வொரு அத்தியாயமும்
கண்ணீரால் கழுவப்படுவதால்
வாழ்க்கை
ஈரமாய்...
வெறுமையாய்...
வாடகைக்காய்...
காத்துக்கிடக்கிறது
வாழ்க்கை வாடகைக்கு உண்டு...

கண்களால் தீண்டும் இன்பம் உயிரில்...

உயிருக்கு உருவம் உண்டு

அந்த உயிரையும் என்னவளிடம்

நான் கண்டதுண்டு

கைகளால் தீண்டும் இன்பம்

உடலில்

கண்களால் தீண்டும் இன்பம்

உயிரில்...

அந்நியதேசம்

காற்றில் அடிபட்டு வந்து
ஒட்டிக்கொள்ளும் காகிதம் போல்
ஊரையும் உறவையும் பிரிந்து
உரிமையேதும் இல்லாத
ஓர் தேசத்தில் வந்து
ஒட்டிக்கொண்டுவிட்டேன்...

ஓராயிரம் உயிர்கள்...

பூமித் தாயின் ஓர் கோணத்தில்

செல்வத்தென்றல் வீசுகின்ற

போதிலும் கூட

மறு திசையில் வறுமைப்புயலோடு

போராடி துடிதுடித்து

உயிர் துறந்து போகின்றன

ஓராயிரம் உயிர்கள்...

எத்தனையாண்டுகள் கடந்த போதிலும்...

வல்லரசுகளின் பலப் பரீட்சைக்குள்

சிக்குண்டு சீரழிந்த தேசங்கள்
சமாதானப் போர்வை போர்த்தி
நிழல் யுத்தம் நடந்தேறும்
பூமிப்பாகங்கள் - என
அனைத்து மண்ணும்
கண்ணீரில் குளித்து
துடைக்காமல்தான் கிடக்கின்றன
எத்தனையாண்டுகள் கடந்த போதிலும்...

வாழ்க்கை ஒரு அதிசயமான கட்டுரை

வாழ்க்கை ஒரு அதிசயமான கட்டுரை

அது காற்புள்ளிகள் மூலம்தான்

நீண்டு கொண்டிருக்கின்றது

சந்தோசம்,

வெற்றி,

திருப்தி என்பன

வினாக்குறிகள் மீது

தொங்கிக் கொண்டிருப்பவை...

விறகு...

என்னதான் தெரிந்தாலும்

என்னிடம் இருக்கும் விளக்குகளை விடவும்

தூக்கி எறிந்த விறகுகளிடமிருந்துதான்

வாழ்க்கைக்கு இங்கே வெளிச்சம் கிடைக்கிறது...